Pagsusuri Sa Kasalukuyang Polisiya Ng Mtb-Mle At Sa Kahusayan Ng Mga Guro Sa Pagtuturo Sa Polanco, Zamboanga Del Norte: Tugon Sa Pagpapaunlad Ng Implementasyon Ng K-12 Kurikulum

AUTHOR(S)

Glenda Abejero-Tampon, MA-Fil

ABSTRACT

Ang pag-aaral ay naglalayong masuri ang implementasyon ng programang MTB-MLE sa Munisipalidad ng Polanco sa lalawigan ng Zamboanga del Norte sa pamamgitan ng pagtatasa sa kasalukuyang polisiya ng MTB-MLE sa pangkalahatan nitong layunin, at sa kahusayan ng mga guro sa pagtuturo. Ginamit sa pag-aaral na ito ang kwantitatib-deskriptib sa pamamagitan ng ebalwatib na pamamaraan dahil ito ay isang proseso na naglalayon sa pagtipon, pagsuri, pag-uri at pagsukat ng mga datos tungkol sa kasalukuyang kondisyon, gawain, paniniwala at proseso, at pagbibigay ng angkop at tamang interpretasyon na ginagamitan ng mga pantulong na istatistikal na pamamaraan. Ang mga guro ay lubos na sumang-ayon sa paggamit ng MTB-MLE na may kwalipikasyong napakahusay. Ito ay nagpapakita lamang na bukal sa kanilang loob ang pagtanggap sa bagong programa na ipinatupad ng Kagawaran ng Edukasyon sa ilalim ng K to 12 Kurikulum. Puspusan din ang ginawang pagsubabay ng Kagawarang Pang-edukasyon sa ikauunlad ng Implemensyon ng MTB-MLE sa bawat paaralang nasasakupan. Ang kasalukuyang polisiya sa pangkalahatan nitong layunin ay lubos na sinasang-ayunan ng mga respondent.
Sa pananliksik na ito ay iminungkahi na hikayatin ang mga guro, mananaliksik atbp., na gumawa ng mga diksyunaryo ayon sa Wikang Cebuanong Binisaya na nakasanayan at nakagisnan ng mga mag-aaral at magkaroon pa ng ibayong rebisyon sa mga aklat, modyul at iba pang kagamitan na ginagamit sa pagtuturo ng unang wika upang maiangkop ito sa lugar na gumagamit nito. Ang pagkakaroon ng mga karagdagang seminar o pagsasanay na nakapokus sa MTB-MLE ay makakatulong din sa mga guro para sa mas lalong paghubog ng kanilang kakayahan at kaalaman. Iminumungkahi na higit pang paigtingin ang implementasyon ng programa sa pamamagitan ng pagsasagawa ng ebalwasyon sa mga paaralan ng kasalukuyang kalagayan ng MTB-MLE at tingnan muli ang mga superbison sa dibisyon kung paano isinasagawa at sinusunod ang polisiya ng DepEd Order 74 s 2009. Ang mga punong-guro at mga pinuno ng Kagawarang Pang-edukasyon ay dapat maglunsad ng mga programa, palatuntunan at patimpalak upang higit na mapaunlad at malinang ang kakayahan at kasanayan ng mga guro at mag-aaral. Para sa mga magulang, komunidad at sa mga taong maging sangkot sa programang ito, iminungkahing magkaroon ng oryentasyon upang mas maunawaan ng nakararami ang nasabing programa.