Sipat-Suri Sa Implementasyon Ng Ched Memo Order No.20 S.2013 Sa Mga Guro At Mga Mag-Aaral Ng Jose Memorial State University, Dipolog Campus, Dipolog City

AUTHOR(S)

Daisy P. Ruiz, MA-Fil

ABSTRACT

Layunin ng pag-aaral na mabatid ang epekto ng implementasyon ng CHED Memo Order No. 20 s. 2013 o ang “General Education Curriculum Holistic Understandings, Intellectual and Civic Competencies” sa mga guro at mga mag-aaral ng Jose Rizal Memorial State University, Dipolog Campus, Dipolog City.
Ginamit sa pag-aaaral ang kwantitatib-deskriptib-ebalwatib na pamamaraan, isang proseso na naglalayon sa pagtipon, pagsuri, pag-uri at pagsukat ng mga datos tungkol sa kasalukuyang kondisyon, gawain, paniniwala at proseso, at pagbibigay ng angkop at tamang interpretasyon na ginagamitan ng mga pantulong na istatistikal na pamamaraan. Natuklasan na positibo ang epekto ng implementasyon ng programa sa proseso ng pagtuturopagkatuto ng mga respondente. Lubos silang sumasang-ayon na naimumulat ng mga guro ang mga mag-aaral sa kahalagahan ng isang intelektwalisadong wikang Filipino, natutulungan na yakapin ang sariling wika bilang pagpapakita ng pagmamahal sa bayan sa lahat ng pagkakataon at sa anumang sitwasyon, at nalilinang ng guro ang kanilang kakayahang pangwika. Ang mga magaaral ay lubos na sumasang-ayon na napauunlad nito ang kanilang isipan at pagkatao, nakatutulong ang mga kaalaman at kasanayang matatamo sa pagpapataas ng kalidad ng edukasyon sa bansa. Lubos na sumasang-ayon na ang nasabing programa ng CHED ay lilinang ng intelektwal na kompetensi, personal at pansibiko na responsibilidad, at praktikal na kasanayan. Sa kabuuan, ang lubos na pagsang-ayon ng mga respondente ay nangahulugang ang estado ng implementasyon ng nasabing programa ng CHED sa lugar ng pananaliksik ay napatunayang lubos na naiimplementa.
Iminumungkahi na mas palawakin pa ang disiminasyon ng CHED ukol sa kanilang mga programa upang magkaroon ng sapat na kaalaman ang mga guro, mga mag-aaral at mamamayang Filipino at upang maiwasan ang mga negatibong reaksyon at hindi pagkakaunawaan. Mas paigtingin pa ang kalidad ng pagtuturo ng mga gurong nagtuturo ng mga asignaturang Filipino at mas ihanda sila sa anumang mga pagbabago upang makaagapay sa ninanais na pagsulong tungo sa globalisasyon. Sa pagsulong tungo sa globalisasyon, hindi kailangang alisin o tanggalin ang pagpapagamit ng wikang Filipino bilang midyum ng pagtuturo kaya, iminumungkahi na magsagawa ang mga State Colleges at Universities ng malawakang pagpaplano para ito ay mapanatili at hindi maalis sa hinaharap. Upang makasabay at hindi mapag-iiwanan ang wikang Filipino sa mabilis na pagbabago ng daigdig dulot ng globalisasyon, tulungan ang KWF sa kanilang adhikain sa pagsusulong ng intelektwalisadong wikang Filipino.