Dokumentaryong Pagsusuri ng mga Maikling Kuwento ng Isang Bayan ng Camarines Sur

AUTHOR(S)

Jessa Armillos Armas

ABSTRACT

Pangunahing layunin ng pag-aaral sa Dokumentaryong Pagsusuri ng mga Maikling Kuwento sa bayan ng Nabua. Sinagot sa pag-aaral na ito ang mga sumusunod: 1) Ano-ano ang mga natatanging maikling kuwento sa isang bayan ng Nabua? 2)Ano-ano ang mga kultural na dimensiyon na masasalamin sa iba’t – ibang maikling kuwento sa bayan ng Nabua sa lalawigan ng Camarines Sur. Batay sa: (a. Tradisyon, b. Relihiyon, c. Pamumuhay, at d. Kaugalian). 3) Anoano ang mga salik na nakakaapekto sa pagpapanatili ng kaalaman hinggil sa Maikling Kuwento? 4) Ano ang maipapanukala na makapagpapaunlad ng maikling kuwento batay sa kinalabasan ng pag-aaral?
Sa pananaliksik na ito, maingat na gumamit ng paraang (Micro-etnograpikong pag-aaral) ang mananaliksik. Ito ang panlipunang pag-iimbestiga at pagtuklas sa mga panlipunang konteksto na ipinapakita ang pagpapahalaga sa wika, kultura, tradisyon at sa panitikan. Ginawa ang pakikisalamuha, pakikipanayam at pag-oobserba sa lugar upang edokumento ang mahahalagang datos na may kaugnayan sa pag-aaral na ito. Naghanda ang mananaliksik ng mga talatanungan upang maging gabay at suporta sa dapat na sagutin ng mga respondente. Natuklasan na mayroong mga tagong yamang panitikan maikling kuwento na sumasalamin sa kultural na dimensyon. Nangibabaw sa mga kuwento na sumasalamin sa kultural tulad ng kuwentong katatakotan, pakikisalamuha, pananamapalataya, ugali, disiplina, at ang simpleng pamumuhay noon. Nagsilbi rin itong repleksyon at daluyan ng masining na imahinasyon ng bawat indibidwal batay sa realidad na nagaganap sa kanyang lipunan o batay sa kanyang karanasan. Higit na kinakailangan na mapreserba at mapahalagahan ang mga natatanging panitikan ng pagkakakilanlan upang magamit at malaman pa ito ng mga susunod na henerasyon. Kaugnay na rin dito ang ilang mga salik na natuklasan na maaaring nakakaapekto sa pagpapanatili ng mga maikling kuwento.
Sa kabuoan, makabuluhan ang pag-aaral dahil bawat mamamayan muling binalikan ang lokal na maikling kuwento mula sa nakaraan na kapupulotan ng aral at magagamit ng susunod na henerasyon. Nilikom ng mananaliksik upang magsilbing kagamitan at pumukaw sa interes ng mga mambabasa. Maging karagdagan sa kagamitang pampagtuturo ng mga guro. Mababanaag ninyo ang pagtalunton mula sa nakaraan at mabigyan ng panibagong kaalaman tungkol sa maikling kuwento na sumasalamin sa kultural na dimensyong tradisyon, relihiyon, pamumuhay at kaugalian.